الرئيسية
كيفكم يا بنات....ان شاء الله جميعا بخير.....
.حبيت اعمل شبه موسوعة لما اعرفه و بحثت و سألت عنه فيما يخص الطب الشعبي الفلسطيني...ضمن حملتنا مع فلسطين......
لكني فكرت ان اقدمها في اطار مختلف منعا للرتابة و الملل
و تتعرفو شوي على اللهجة الفلسطينية....
ان شاء الله تعجبكم
اليوم يا بنات،رح اعرفكم على ( ستّي) ، و هي من رواد الطب الشعبي الفلسطيني، رح
اسألها عن بعض الوصفات....
تابعوني
-يا ستّي الله يطولنا بعمرك،عندي كم سؤال اذا فيكي تجاوبيني...
- اي انا عندي كم رهووفة......، اسألي يا ستي ايش بدك...
- يا ستي صدري طابق علي، و نفسي ضايق، شو فيني اعمل...
- ول سلامتك، هذا اكيد البرد، كلتلك (قلت لك) لا تروحي من مكان دافي لمكان بارد كبل
(قبل) ما تشربي كاسة مي (ماء)، خذيلك شوية عسل و اخلطيهم مع صفار بيضة و
اشربيهم على الريق، بتروح السعلة ان شاء الله، و من شان صدرك خذيلك شوية عصير
قصب هاذ بينظف الحلق و اذا معك بلغم كليلك كم حبة فجل، و من شان نفسك اللي
ضايق، احرقي شوية شيح و سكر و استنشقيهم بتصيري مثل الفلة......و لا تنسي تدهني
صدرك بزيت السمسم بالليل......
- طب يا ستّي جارتنا و قعت و انجرحت بإيدها ايش فيني اسويلها....؟؟
- اذا جرحها بينزف خليها تحط عليه ثوم مدقوق او تقطر عليه خل بس لازم تتحمل
الوجع...و بعدين خليها تحط عليه بذر كتان مطحون وان شاء الله بتطيب...
- و من شان اللدغات يا ستّي شو نعمل.؟؟
- اذا لدغة دبور، حطي عليها حبة القطين، و اذا لدغة حية (اللهم عافينا) بنربط فوق
اللدغة بحبل قوي حتى ما يمشي السم، و بنحط على اللدغة ثوم و ملح او ثوم و عسل و
لازم الملدوغ يشرب لبن او خل او سكر...و عضة الكلب بنكوي حوليها بالنار و بنحط
عليها ملح و ثوم مدقوقين مع بعض و معجونين بالعسل...
- و جدّو يا ستّي عم يشكي من ظهرو...
ظبطت ستي قعدتها و قلت لي:
- هاذ بدو (رقعة) يا ستّي، اللي عي شاشة بيضاء بنحط عليها عجينة بيض و طحين و
نحطها على ظهرو بيروح الوجع بإذن الله...
- و من شان مفاصلو يا ستّي؟؟
- انا كلتللو (قلت له) ما الك الا رمل البحر او النهر ، يدفن رجليه فيه و بيكوم (يقوم) ينط
مثل الحصان....اما الرطوبة بتروح باللنجة اللي هي كطعة (قطعة ) من الصوف مبللة
بالزيت و المي السخنة (ماء ساخن)...
- و سناني يا ستّي...؟؟
- جيبي شوية ملح و دقيهم و حطي عليهم شوية عسل و افركي سنانك بتصير بتبرك
(تبرق)...و كلي بلح و بذر دوار الشمس من شان تكوى (تقوى) لثتك..و اذا معك وجع
بضرسك لا سمح الله..امضغي حبة ثوم ....
- بنت جارتنا الصغيرة معها امساك يا ستّي و عيونها حمرة..
- من شان الامساك خلي امها تعملها تحميلة حبة صنوبر بزيت الزيتون...و من شان
عيونها خلي امها تكحلها اياهم و تقطرلها من حليبها فيهم، ما في احسن من حليب الام
لعيون الاولاد الصغار...
- و اللي انكسرت رجلواو أيدو يا ستي...
-يا لطيف، هاذ بدو "قدحة" و اللي هي نوع من النباتات يستخدم في الكي، و بنجبرلو اياها بالبيض...
- و الكلى يا ستي،
- اللبان مدقوق يفتت الحصى بالكلى، و اكل الحمص و السكر كمان مفيد، شرب العسل
ما في احسن منو يدر البول بس احيانا بيحبسو حسب حالة المريض... و الزعتر و
الكمون كمان بيدرو البول...
يتببببببببببببببببببببببببببببببببع
